【見工問題系列1: 有冇用過我哋嘅產品】
噚日有兩個求職者，去咗同一間公司interview同一個職位，牌面以Andy秤先，master之餘經驗又較多，但佢最後輸俾high dip 畢業嘅Doris，爆咗個小冷門，HR話咗俾我知點解。
Department Head喺interview期間分別問佢哋同一條問題: 有冇用過我哋公司嘅背囊產品？
Andy: 「哈哈，冇呀，因為太貴。」誠實係好嘅，無須刻意吹水，但可以婉轉啲，避重就輕。
Doris: 「唔止我呀，我屋企人同埋身邊啲朋友都有用，有幾個款令我好有印象，價錢走高檔路線，唔會一街都撞哂款。」
Doris接近完美嘅示範，誠實度扣咗10分，但應對就值90分。其實你去Nike、Adidas 呢類公司interview ，唔通真係要著住波衫去咩，又假設你去車行見工，難道要買過佢架車咩，佢賣林寶堅尼咁點呀？我睇開羅比堅尼咋。
本身係用家當然最好啦，但對方其實想睇你熟唔熟悉佢哋嘅產品，仲有上嚟見工之前有冇做功課。咁驚唔驚話有用，會引發其他問題，例如問件產品點構造？用咩質料？嗱，除非你係interview落手落腳製造嗰個部門，否則以用家角度去講就足夠喇。
未用過都唔緊要，見工之前記得上網或者落舖頭睇下，起碼大約知咩款式同埋路線， G2000同Armani都有西裝，但係target嘅市場都唔同啦。如果間公司喺香港冇舖頭，又或者係賣service而唔係賣product，亦可以去間公司嘅website睇下，甚至google下資料同新聞。
係咪佢公司擁躉唔係重點，你有冇做功課去預備同埋了解先係最重要。
記得，「你想搵份工」同埋「你想做佢公司份工」 係兩件好唔同嘅事，祝大家搵工順利。
＝＝＝＝＝
IG: officedailyhk / 辦公室日報
Search